ಶಿವಮೊಗ್ಗ :  ರಾಜ್ಯ ವಿಧಾನ ಪರಿಷತ್‌ನ ಒಂದು ಸ್ಥಾನಕ್ಕಾಗಿ ಸ್ಥಳೀಯ ಸಂಸ್ಥೆಗಳ ಮೂಲಕ ನಡೆಯಲಿರುವ ಚುನಾವಣೆಗೆ ಜಿಲ್ಲೆಯಲ್ಲಿ ಎಲ್ಲಾ ಸಿದ್ಧತೆಗಳನ್ನು ಕೈಗೊಳ್ಳಲಾಗಿದೆ ಎಂದು ಜಿಲ್ಲಾಧಿಕಾರಿ ಕೆ.ಬಿ.ಶಿವಕುಮಾರ್ ತಿಳಿಸಿದ್ದಾರೆ. ಜಿಲ್ಲೆಯಲ್ಲಿ ಒಟ್ಟು 4164 ಅರ್ಹ ಮತದಾರಿದ್ದು, ಇವರಲ್ಲಿ 1982 ಪುರುಷ ಹಾಗೂ 2181 ಮಹಿಳಾ ಮತದಾರರಿದ್ದಾರೆ. ಇವರಲ್ಲಿ 93 ಅನಕ್ಷರಸ್ಥ ಮತದಾರರಿದ್ದು, ಇವರು ಜತೆಗಾರರ ನೆರವಿನೊಂದಿಗೆ ಮತ ಚಲಾಯಿಸುವ ಅವಕಾಶ ಪಡೆದಿದ್ದಾರೆ.

ಸೊರಬ ಪಟ್ಟಣ ಪಂಚಾಯತ್ ವ್ಯಾಪ್ತಿಯಲ್ಲಿ 14 ಮತದಾರರು, ಶಿಕಾರಿಪುರ ಪಟ್ಟಣ ಪಂಚಾಯತ್ 30, ಹೊನ್ನಾಳಿ ಪುರಸಭೆ 22, ಚೆನ್ನಗಿರಿ ಪಟ್ಟಣ ಪಂಚಾಯತ್ 29, ಭದ್ರಾವತಿ ನಗರ ಸಭೆ 37, ಶಿವಮೊಗ್ಗ ಮಹಾನಗರ ಪಾಲಿಕೆ 45, ಸಾಗರ ನಗರಸಭೆ 37, ಹೊಸನಗರ ಪಟ್ಟಣ ಪಂಚಾಯತ್ 14, ತೀರ್ಥಹಳ್ಳಿ ಪಟ್ಟಣ ಪಂಚಾಯತ್ 16 ಸದಸ್ಯರು ಮತದಾನದ ಹಕ್ಕು ಹೊಂದಿದ್ದಾರೆ. ಹಾಗೆಯೇ ಇವರ ಜೊತೆಗೆ ಈ ವ್ಯಾಪ್ತಿಯ ಇತರ ಜನಪ್ರತಿನಿಧಿಗಳು ಸಹ ಮತದಾನದ ಹಕ್ಕು ಹೊಂದಿದ್ದಾರೆ.

ಇನ್ನ ಗ್ರಾಮಪಂಚಾಯಿತಿ ಸದಸ್ಯ ಮತದಾರರ ಕುರಿತು ನೊಡೋದಾದ್ರೆ, ಸೊರಬ ತಾಲೂಕಿನಲ್ಲಿ 304, ಶಿಕಾರಿಪುರದಲ್ಲಿ 470, ಹೊನ್ನಾಳಿಯಲ್ಲಿ 321, ನ್ಯಾಮತಿಯಲ್ಲಿ 190, ಚನ್ನಗಿರಿಯಲ್ಲಿ 730, ಭದ್ರಾವತಿಯಲ್ಲಿ 431, ಶಿವಮೊಗ್ಗದಲ್ಲಿ 456, ಸಾಗರ 379, ಹೊಸನಗರದಲ್ಲಿ 294, ಹಾಗೂ ತೀರ್ಥಹಳ್ಳಿಯಲ್ಲಿ 335 ಗ್ರಾಮ ಪಂಚಾಯತ್ ಸದಸ್ಯರು ಮತದಾನದ ಹಕ್ಕು ಹೊಂದಿದ್ದಾರೆ.

ಜಿಲ್ಲೆಯಲ್ಲಿ 365 ಮತಗಟ್ಟೆಗಳನ್ನ ಸ್ಥಾಪಿಸಲಾಗಿದೆ. ಸೊರಬ 28, ಶಿಕಾರಿಪುರ 43, ಹೊನ್ನಾಳಿ 29, ನ್ಯಾಮತಿ 17, ಚನ್ನಗಿರಿ 62, ಭದ್ರಾವತಿ 38, ಶಿವಮೊಗ್ಗ 41, ಸಾಗರ 37, ಹೊಸನಗರ 31 ಮತ್ತು ತೀರ್ಥಹಳ್ಳಿಯಲ್ಲಿ 39 ಮತಗಟ್ಟೆಗಳಿರಲಿವೆ. ಮತದಾನ ಪ್ರಕ್ರಿಯೆಯನ್ನು ಸುಗಮವಾಗಿ ನಡೆಸಲು ಪ್ರತಿ ಮತಗಟ್ಟೆಯಲ್ಲಿ ತಲಾ ಮೂರು ಮಂದಿ ಚುನಾವಣಾ ಅಧಿಕಾರಿ ಹಾಗು ಸಿಬ್ಬಂದಿ ನಿಯೋಜಿಸಲಾಗಿದೆ.

ಹಾಗೆಯೆ ಪ್ರತಿ ಮತಗಟ್ಟೆಯಲ್ಲಿ ಒಬ್ಬ ಮೈಕ್ರೋ ಅಬ್ಸರ್‍ವರ್, ಒಬ್ಬ ಪೊಲೀಸ್ ಸಿಬ್ಬಂದಿ ಹಾಗೂ ಒಬ್ಬ ವಿಡಿಯೋಗ್ರಾಫರ್ ಇರಲಿದ್ದಾರೆ. ಮಸ್ಟರಿಂಗ್ ಕಾರ್ಯ ಮುಗಿದ ಬಳಿಕ ಚುನಾವಣಾ ಸಿಬ್ಬಂದಿಯನ್ನು ತಾಲೂಕುಗಳಿಗೆ ಕರೆದೊಯ್ಯಲು ೩೮ ಬಸ್ ವ್ಯವಸ್ಥೆ ಮಾಡಲಾಗಿದ್ದು, ಚುನಾವಣಾ ಕರ್ತವ್ಯ ನಿರ್ವಹಣೆಗಾಗಿ 13 ಜೀಪ್‌ಗಳ ವ್ಯವಸ್ಥೆ ಮಾಡಲಾಗಿದೆ.

ಇನ್ನು ಮಾದರಿ ನೀತಿ ಸಂಹಿತೆ ಅನುಷ್ಠಾನಕ್ಕಾಗಿ ೩೩ ನೋಡಲ್ ಅಧಿಕಾರಿಗಳು, ಚುನಾವಣಾ ಪ್ರಕ್ರಿಯೆಗಳ ಮೇಲುಸ್ತುವಾರಿಗಾಗಿ ೨೮ ನೋಡಲ್ ಅಧಿಕಾರಿಗಳು, 34 ಫ್ಲೈಯಿಂಗ್ ಸ್ಕ್ವಾಡ್‌ಗಳನ್ನು ರಚಿಸಲಾಗಿದೆ. ಸುಗಮ ಮತದಾನಕ್ಕಾಗಿ ೩೬೫ ಮತಗಟ್ಟೆ ಅಧಿಕಾರಿ ಹಾಗೂ ಸಿಬ್ಬಂದಿ ತಂಡ ರಚಿಸಲಾಗಿದೆ. 65 ತಂಡಗಳನ್ನು ಕಾಯ್ದಿರಿಸಲಾಗಿದ್ದು, ಒಟ್ಟು 430 ಮತಗಟ್ಟೆ ಅಧಿಕಾರಿ ತಂಡಗಳಿರಲಿವೆ.